Вучиќ: Србија до крајот на годината од ЕУ ќе добие подршка од 165 милиони евра

2

На средбата на претседателот на Србија, Александар Вучиќ, со еврокомесарот за соседство и проширување, Оливер Вархеји, разговарано е и за енергетиката и барањето за воведување санкции против Русија.

По средбата со Вархеји, Вучиќ изјави дека ги разбира неговите забелешки во однос на усогласувањето на надворешната политика на Србија со ЕУ.

-Преку територијата на Србија никој не може да ги заобиколи санкциите што ЕУ ги воведе кон Руската Федерација и Србија реагира и ќе ги санкционира такви обиди, рече Вучиќ.

Вучиќ се заблагодари на ЕУ за финансиската помош, наведувајќи го фактот дека Србија троши меѓу 42 милиони евра за увоз на струја во ноември и очекуваните 90 до 100 милиони евра во декември, и дека „по комбинирани цени“ на месечна основа троши „не помалку од 200 милиони евра“ при увоз на гас.

Тој се заблагодари за најавената клучна буџетска помош од 165 милиони евра до крајот на оваа година, која ја најави и претседателката на Европската комисија, Урсула фон дер Лејен, за време на нејзината неодамнешна посета на Србија.

-Тоа е голема, исклучително значајна сума пари за нас, тоа е важна и голема работа што ЕУ ја заврши во интерес на земјите од Западен Балкан, а Србија секако ги доби најзначајните финансиски средства, рече Вучиќ.

Како што кажа, разговарале и за натамошната енергетска диверзификација на Србија, можноста за набавка на дополнителни количества гас од Азербејџан, забрзување на работата на интерконекторот Србија-Бугарија, пристапот до терминалите за течен нафтен гас и за интерконектор Србија-Северна Македонија.

-Разговаравме за многу стратешки работи, но и за проекти во кои веќе сме заедно со ЕУ, како што е брзата пруга Белград-Ниш. Среќен сум што и Нишлии и југот на Србија ќе имаат брза железница и врска со Будимпешта, Виена, како и Белград и Нови Сад, рече Вучиќ и додаде дека на тој план ЕУ предвидела огромна поддршка, не само преку поволни заеми, но и во грантови.

Во присуство на српскиот претседател Александар Вучиќ и еврокомесарот Оливер Вархеји денеска во Белград беа потпишани три договори меѓу Србија и Европската унија.

Министерката за евроинтеграции Тања Мишчевиќ и шефот на Делегацијата на ЕУ во Србија, Емануел Жиофре потпишаа рамковен договор за финансиско партнерство меѓу Србија и Европската комисија за правилата за спроведување на финансиската помош од ЕУ за Србија во рамките на програмата ИПА 3.

Жиофре и министерката за здравство Даница Грујичиќ потпишаа договор за поддршка на миграциите и пристап до здравствената заштита.

Потпишан е и Договор за поддршка на ЕУ за Србија во управувањето со миграцијата, зајакнувањето на системот за управување со миграцијата и граничната контрола.