Груевски земал пари на рака, тврди сведокот во „Талир“, Сиљан Мицевски

69

На барање на Обвинителството, битолскиот бизнисмен Сиљан Мицевски, денеска сведочеше во случајот „Талир“, кој се однесува на незаконско финансирање на партијата ВМРО-ДПМНЕ, преку фалсификувани уплатници.

Бизнисменот Мицевски, кој во медиумите стана познат и по делото „Меѓународен сојуз“, каде првообвинет е Бојан Јовановски, во судницата откри дека му дал десет илјади евра на рака на поранешниот претседател на партијата Никола Груевски. Тој додаде дека, не по негова волја, финансирал и спортски клубови, односно дека му било кажано да донира илјадници евра на КК МЗТ-Скопје.

Сведокот на обвинителката Ленче Ристовска, Мицевски, нагласи дека ја финансирал и кампањата на СДСМ.

Инаку, во случајот Талир обвинети се Никола Груевски, Кирил Божиновски и Миле Јанакиески, кои се товарат за „злоупотреба на службената положба и овластувања” и „перење пари”, како и Илија Димовски, Леко Ристоски и Елизабета Чингаровска обвинети само за делото „перење пари”. За истото дело, како правен субјект со обвинението опфатена е и ВМРО-ДПМНЕ, чиј имот е замрзнат.