КОВИД-19 статистика: Вториот пик донесе двојно повеќе жртви

13

За прв пат по 25 мај во Македонија поминува ден во кој статистиката на Министерството за здравство не регистрира смртни случаи предизвикани како последица на корона вирусот. Тоа е вкупно деветти ден без жртви од почетокот на април.

Во текот на вчерашниот ден 1636 тестирања дале 163 позитивни резултати, што значи дека секој десетти тест бил позитивен. Најголемиот дел од новите случаи, 52 се регистрирани во Скопје. Штип со нови 33 случаи станува ново жариште на истокот, а 21 случај е регистриран во Куманово.

Според статистиката на Министерството за здравство од почетокот на кризата до сега починале 432 пациенти. Најголемиот број смртни случаи, 169 се регистрирани во јуни, а во 21 ден од јули има 130 случаи.

Министерството за здравство вчера информираше дека близу 63 илјади граѓани ја преземале апликацијата стоп корона но таа не помогнала да се открие ниту еден позитивен случај на КОВИД19.

Инаку во текот на вчерашниот ден, полицијата напишала вкупно 432 казни за непочитување на мерката за носење на заштитна маска. Од МВР апелираат до граѓаните да ги почитуваат мерките за заштита.