Мицотакис: Атина ќе го забрза истражувањето на гасот

1

Грчкиот премиер Киријакос Мицотакис рече дека Грција ќе ги забрза проектите за истражување на гас во договор со приватни инвеститори.

Операцијата на Русија во Украина и стравувањата од испораките на гас во Европа го влошија скокот на цените на енергијата, принудувајќи ја Европската унија да бара начини да ја намали зависноста од рускиот гас за две третини оваа година и да стави крај до 2027 година.

Грција, која покрива околу 40 отсто од своите годишни енергетски потреби со руски гас, во минатото произведуваше мали количини нафта и се обиде да го истражи својот јаглеводороден потенцијал.

Но, ниските цени на суровата нафта во претходните години, преминот кон зелена енергија и недостатокот на политичка волја ги запреа плановите за истражување.

– Забрзувањето на експлоатацијата на националните енергетски ресурси на земјата ќе ни овозможи, доколку имаме среќа и имаме експлоатирачки полиња на природен гас, да ја подобриме нашата енергетска независност и безбедност – рече Мицотакис.

Мицотакис, кој денеска се сретна со лидерите на државната комисија за јаглеводороди и енергетска индустрија, додаде дека Грција има за цел да има јасна идеја до 2023 година дали има резерви на гас што би можела да ги користи, додека индикации за потенцијални резерви гас досега ја направија владата „оптимист“.

Ова забрзување, рече тој, нема да ја поткопа политиката на земјата за зголемување на обновливите извори на енергија и намалување на емисиите на јаглерод за 55 отсто до 2030 година во согласност со целите на ЕУ за климатските промени, пишува Ројтерс.