Ноќ во хотел за едно евро, но под услов престојот да се пренесува во живо

9

Јапонскиот хотел „Бизнис рјокан асахи” во градот Фукуока нуди ноќевање по цена од 130 јени (едно евро), но под услов – престојот во собата да биде пренесуван во живо на интернет, на Јутјуб и другите социјални мрежи.

За пријавување, не мора да се биде познат јутјубер, инфлуенсер, јавна личност, и не мора да правите шоу за привлекување внимание додека сте во хотелската соба. Тоа просто, значи разменување на својата приватност за евтина хотелска соба.

Таа сепак, не е луксузна. Уредена е во традиционален јапонски стил и е со помалку мебел.

Камерите во собата снимаат непрекинато и нема „мртви агли“. Тоалетот и туш-кабината се еден кат подолу. Гостите не смеат да бидат голи, ниту да покажуваат егзибиционистички склоности. Во спротивно, договорот не важи. Дозволено е да се изгаси светлото за време на спиење. Преносот е без звук, зашто управата сака да ги задржи авторските права.

Клучното прашање е – зошто хотелот нуди ваков пакет? Раководството вели дека собата број 8 е најмалку резервирана во целиот хотел и, мислат дека вака таа ќе стане попопуларна и побарана.