Постигнат договор меѓу Министерство за правда и Управата за матични служби

12

Денеска е постигнат договор меѓу Министерството за правда и Управата за матични служби.

Ова денеска на прес конференција го посочија од независниот синдикат на Управата за водење на матични книги, од каде велат дека усогласени се барањата околу колективниот договор со Министерството за правда, поради што се откажува денешниот протест пред Министерството.

Колективниот договор, најдоцна до утре ќе биде доставен до Министерството за финансии од каде очекуваат одговор до понеделник.

Во спротивно најавуваат продолжување на протестите пред Министерството за финансии.

„Најдовме заеднички јазик во делот каде ингеренции има Министерството за правда. Прифатени се голем дел од барањата на Синдикатот како што се делот на отпремнина, К-15 во висина од 60 проценти од просечната плата ….. Сите недоразбирања што беа со Министерството за правда се усогласени и колективниот договор во текот на денешниот или најдоцна до утрешниот ден ќе биде доставен до Министерството за финансии“, изјави Марјан Ристески, претседател на Конфедерацијата на синдикални организации на Македонија – КСОМ.

Тој соопшти дека со новата плата што ја зеле вработените повеќе нема никој во Управата со плата под минималната од 18.000 денари.

Штрајкот во Управата за водење на матични книги продолжува, но од Синдикатот велат дека им се излегува во пресрет на оние граѓани кои итно имаат потреба од документи што ги издава Управата.