РАНО Е ЗА УСТАВНИ ИЗМЕНИ Нема подготовки за предвремени избори

13

Претседателот на Собранието Талат Џафери на денешната средба со новинарите рече дека не се подготвува за предвремени избори, потсетувајќи ја притоа опозицијата дека за тоа се потребни претходни подготовки имајќи предвид дека на сто дена пред вакви избори потребно е да се формира техничка Влада.

Џафери рече исто така дека е преурането да ги коментира најавите за уставни измени и за референдум во врска со европскиот предлог.

-Нема материјал за да се изјаснам. Опозицијата хипотетички прави ситуација – истакна претседателот на Собранието.

Во врска со актуелните случувања во Парламернтот со немањето кворум и активната блокада од ВМРО-ДПМНЕ, Џафери беше дециден дека пратениците треба да си ја заработат платата и да бидат во салата, а дека проблемите во владејачката коалиција треба да се решаваат политички, а не со неприсуство и негласање на законите.

-Не е прашањето на еден субјект, туку еден па друг субјект. Ако односите во извршната власт имаат проблем поради политичките договори, треба таму да ги решаваат. Мене политички договори не ме интересираат. Овде сме дојдени за гласање на закони, рече Џафери.

На средбата со лидерите на парламентарното мнозинство не присуствувале Африм Гаши од Алтернатива и Павле Трајанов од ДС.

– Има две решенија или ќе бидеш присутен или ќе го распуштиш Собранието или направи друго мнозинство. Должни се да присуствуваат на седница, истакна тој. Грешат ако сметаат дека Собранието, како што потенцира, е точката каде што ќе псотавуваат ултиматум. Не ме условуваат мене, туку граѓаните – рече претседателот на Собранието.

Џафери на средбата со новинарите информираше дека од почетокот на неговиот мандат на 4 август 2020 година одржани се 83 седници со 973 точки на дневен ред. Завршени се 54 седници, додека 29 незавршени со 80 точки. Во прегледот тој ја презентираше и работата на комисиите, каде според него се заглавени повеќе закони и покрај тоа што биле исполнети условите и изминати роковите. Во тој контекст Џафери ги обвини опозициските пратеници, кои се претседатели на дел од комисиите, дека блокирале дел од законите.

Одговарајќи на тврдењата дека Собранието е неефикасно и нефукцинонално поради немање кворум, Џафери потенцира дека од почетокот на неговиот мандат само 10 отсто од точките што биле на дневен ред на седниците не се завршени.