Судијата Кадриу: По укинатиот притвор на Јанева добивме порака од Русковска и одржавме итен колегиум

7

Судијата Сафет Кадриу кој е портпарол на Апелацискиот суд во Скопје, а воедно и судија кој постапувал со советот за одлучување на мерката притвор за обвинетата Специјална обвинителка, Катица Јанева потврди дека второстепениот суд одржал колегуим по обвинувањата на обвинителката Вилма Русковска, но детали не соопшти. Судијата Кадриу во изјава за медиумите кратко се повика на тоа дека набрзо од судот ќе биде објавено официјално соопштение.

„Да, одржавме колегиум, но за тоа што се случувало ќе бидете информирани во соопштение кое набрзо ќе биде објавено на официјалната веб-страница на нашиот суд. Точно е и дека имаше смс порака од обвинителката, но ве молам бидете трпеливи додека да го објавиме соопштението“, рече судијата Кадриу.

За имињата на оние кои постапувале заедно со него за одлуката за мерката притвор Кадриу не сакаше да коментира, ниту пак одговори за тоа што било пресудно за да се преиначи мерката притвор во куќен притвор за Јанева.