Во Косово од денеска рестрикции на струја, системот е преоптоварен

Косовското претпријатие за дистрибуција на електрична енергија (КЕДС) соопшти дека електроенергетскиот систем е преоптоварен во последните денови.

Од компанијата наведуваат дека се принудени од денеска да започнеат со рестрикции за струја.

Според КЕДС, се очекува ограничувањето да трае околу два часа и ќе ги зафати сите потрошувачи во различно време, пренесува Локално.

„Последниве денови електроенергетскиот систем во земјава беше преоптоварен. Во исто време, соочена со најголемата светска криза со електрична енергија, пазарниот оператор КОСТТ, врз основа на важечките закони, нареди да започне со рестрикции за електрична енергија. Овие ограничувања ќе бидат околу два часа за сите потрошувачи во различно време, освен за итните служби“, се вели во соопштението.

Засега ограничувањата ќе траат само во следните 24 часа, додека во наредните денови се очекуваат нови инструкции од КОССТ.

Истовремено, се повикуваат потрошувачите на електрична енергија да заштедат максимално електрична енергија и каде што е можно да користат алтернативни форми на греење.