Во тек е седницата на Советот за безбедност, ќе има ли одлука за полициски час?

Од 12 часот заседава Советот за безбедност во Вила Водно. На покана на претседателот Стево Пендаровски, на седницата, присуствува и министерот за здравство, Венко Филипче.

На состанокот се разговара за актуелната состојба со пандемијата со Ковид19 и ги разгледуваат можните опции за справување со здравствената и економската криза предизвикана од вирусот.

До седницата доѓа откако континуирано и со денови бројот на новозаразени и починати е висок, а здравствениот систем, како што кажа неколкупати и министерот Филипче, е под постојан притисок.

Двете опции кои најчесто се споменуваат како можни за намалување на бројот на новозаразени се прогласување кризна состојба и воведување полициски час, од попладневите до утринските часови. Третата можност е Советот да нема никаква препорака и да остане ситуацијата со справување иста- задолжително носење маски секаде, забраната за групирања, забрана за работа на економските оператори по 21 часот и препорака за сите што може да работат од дома да го прават тоа.