Во 2022 година изречени 11 200 мерки за пребрзо возење на тетовското подрачје

 

Одделот за аналитика при СВР Тетово евидентира дека во текот на сите месеци од 2022 година полицајците во редовни и акциски контролни активности, изрекле вкупно 11 200 мерки за неприлагодена брзина според условите на патот, односно за пребрзо возење. Бројката е значително поголема од 2021 година кога полицијата изрекла 8164 казни на возачи кои не ги почитувале сообраќајните знаци, правила и прописи што се однесуваат на максимално дозволената брзина на движење.

-Од вкупно 11 200 мерки, 7189 биле за пречекорување на максимално дозволената, односно пропишана брзина на поширокото тетовско подрачје. Имајќи во вид дека пребрзото возење и лани беше најчестиот прекршок во Полошкиот регион и една од најчестите причини за случените сообраќајни несреќи, Секторот за внатрешни работи Тетово со апел до возачите да не брзаат непотребно и да не ја загрозуваат сопствената и безбедноста на другите учесници во сообраќајот. Ова, посебно се однесува на автопатот Гостивар-Тетово-Скопје и магистралниот пат Гостивар-Кичево, а во последно време и на регионалниот пат Маврови-Анови-Дебар, уште повеќе што деновиве коловозите се влажни и на поедини места лизгави, истакна портпаролот Марјан Јосифоски.

Сите прекршоци биле заокружени со соодветни поднесоци и санкционирани со законски предвидените парични глоби кои за овој вид сообраќаен прекршок се движат од 45 до 400 евра во денарска противвредност.