Грција нема донесено нова одлука за копнените граници

Во Грција нема промени, ниту пак постои нова одлука што се однесува на копнените граници и засега, останува во сила забраната што важи за државјани на трети земји и привремено ограничување на сите авионски, железнички и копнени поврзувања со соседните земји, јави дописничката на МИА од Атина.

Грчките власти вчера најавија дополнителни мерки за спречување на ширењето на коронавирусот во земјата. Од 17 август за влез преку копнените граници задолжително ќе треба да се достави негативен тест, а тоа ќе важи и за грчки државјани и за тие што имаат дозволен престој во земјата.

Забраната за влез во земјата не важи за грчки државјани, за лица кои имаат дозвола за престој и лица кои живеат во Грција, како и за транспорт на стоки, за влез на лица за апсолутно неопходни професионални причини, но и за транзит на болнички возила кои од Косово преку Северна Македонија влегуваат во Грција за хоспитализирање на пациенти кои припаѓаат на дипломатскиот, воениот или административниот персонал на земјите членки на ЕУ и EULEX на Косово.