ЕМА: Сè уште не сме донеле заклучок за можната поврзаност на Астразенека со тромбоза

Европската агенција за лекови (ЕМА) негираше дека утврдила „поврзаност“ помеѓу Астразенека и реткиот синдром на згрутчување на крвта по приемот на вакцината против коронавирусот. ЕМА за АФП изјави дека сè уште не дошла до заклучок и дека испитувањето сè уште трае. Како што изјавија, се очекува да ги објават своите наоди во среда или четврток.

Вчера официјалниот претставник на ЕМА Марко Кавалери изјави дека постои „врска“ помеѓу „Астразенека“ и случаите на тромбоза. „Што ја предизвикува оваа реакција, сепак, сè уште не знаеме… Да резимираме, во следните неколку часа ќе кажеме дека има врска, но сепак мора да разбереме како се случило тоа“, изјави Кавалери за италијанскиот весник Месаџеро.

Тој објаснува дека се обидуваат „да добијат прецизна слика за тоа што се случува, за прецизно да го дефинираат синдромот како резултат на вакцината“.

„Меѓу вакцинираните лица има повеќе случаи на церебрална тромбоза кај младите отколку што би очекувале. Ќе мора да го кажеме тоа“, додаде официјалното лице.

По изјавата на Кавалери, ЕМА соопшти дека сè уште проценува дали вакцината на Астразенека против коронавирусот е поврзана со појава на згрутчување на крвта.

Безбедносниот комитет на агенцијата со седиште во Амстердам „сè уште не дошол до заклучок и истрагата е во тек“, се вели во изјавата на ЕМА за Франс прес.

ЕМА додава дека одлуката за тоа треба да биде објавена во среда или четврток.

Во последниве недели се појавија сомневања за можни сериозни несакани ефекти, но ретки, откако се појавија случаи на атипична тромбоза кај лица вакцинирани со Астразенека.

ЕМА досега тврдеше дека „не е докажана никаква поврзаност со вакцината“ иако е „можна“ и дека придобивките од вакцинацијата против коронавирусот ги надминуваат ризиците.

Неколку земји затоа ја запреа вакцинацијата со Астразенека, додека производителот на вакцини во март рече дека „нема докази за зголемен ризик“.