Зеленски против руски спортисти на Олимпијадата 2024 во Париз

Украинскиот претседател Володимир Зеленски во разговор со својот француски колега Емануел Макрон рече дека на руските спортисти не треба да им биде дозволен настап на Олимписките игри во Париз идната година.

„Особено инсистирав на тоа дека руските спортисти не би требало да имаат свое место на Олимписките игри во Париз“, изјави Зеленски по телефонскиот разговор со Макрон.

Руската инвазија врз Украина почна на 24 февруари лани, а набрзо потоа Меѓународниот олимписки комитет (МОК) ги суспендираше руските и белоруските спортисти, бидејќи инвазијата почна од белоруска територија.

Првиот човек на МОК во новогодишната порака рече дека сака санкциите да бидат продолжени и во текот на 2023 година.

„Санкциите против руските и белоруските држави и влади ќе останат цврсто на сила. Сакаме силна украинска екипа на ОИ во Париз 2024 и на Зимските ОИ 2026 во Милано“, рече Бах.