Изборниот штаб на Трамп нема да им издава акредитации на новинарите од Блумберг
Предизборниот штаб на американскиот претседател Доналд Трамп објави синоќа дека нема повеќе да им издава акредитации на новинарите на Блумберг њуз, агенцијата во сопственост на потенцијалниот демократски претседателски кандидат Мајкл Блумберг.
Новинската агенција Блумберг њуз по формалната објава на кандидатурата на Мајкл Блумберг објави дека нема повеќе критички да ги следи демократските претседателски кандидати, но дека ќе ја следи кампањата на Трамп.
Со акредитација новинарите можат полесно да пристапат до предизборните собири и други настани во рамки на кампањата за претседателските избори кои ќе се одржат во ноември 2020.
Обичните граѓани мора да купат билет и да чекаат во долги редови за да дојдат на предизборен собир.
„Бидејќи отворено ја покажаа својата пристрасност, штабот на Трамп повеќе нема да им издава акредитации на претставниците на Блумберг њуз за предизборните собири и другите настани во кампањата“, изјави шефот на Трамповиот предизборен штаб Бред Парскејл.
„Ќе одлучиме дали ќе одговараме на поединечни новинари или ќе одговараме на прашањата на Блумберг њуз поединечно за секој случај“, додаде тој.
Милијардерот Блумберг, поранешен градоначалник на Њујорк, објави на крајот на ноември дека влегува во трката за номинација за претседателски кандидат на демократите и така се придружи на долгата листа на кандидати.
Седумдесетгодишниот Блумберг, еден од најбогатите Американци, целосно го смени мислењето од март кога кажа дека нема да се натпреварува.
Блумберг, кого Форбс го стави на осмото место на листата на најбогати Американци со процена дека „тежи“ 53,4 милијарди долари, може самиот да ја финансира кампањата и да потроши милиони долари на огласување и вработување луѓе во својата кампања.
Во кампањата тргна додека двајцата кандидати со најголеми шанси за освојување на претседателската номинација, Берни Сандерс и Елизабет Ворен, удираат по милијардерите и ветуваат наметнување нови даноци за супербогатите.