Илон Маск повторно го урна биткоинот со само еден збор

Најголемата криптовалута во светот, биткоинот, вчера почна да паѓа, откако милијардерот Илон Маск на Твитер ги разгоре шпекулациите дека неговата компанија Тесла размислува да ги продаде или веќе ги продала своите акции во криптовалутата.

„Биткоинерите ќе си чукаат глава во наредниот квартал кога ќе дознаат дека Тесла го отфрлила остатокот од своите биткоини“, рече вчера корисникот по име Криптовејл во твит. „Со огромната омраза што ја добива Илон Маск, јас не би го ни обвинил“, додаде тој.

Маск едноставно одговори со еден збор: „Вистина“.

По тоа цената на биткоинот потона за скоро 8,5% на дури 42,441 долари по монета. Тоа беше најголемиот пад во повеќе од три месеци и еден од најголемите падови на вредноста на биткоинот, откако цената првпат почна да расте во јануари.

Минатата недела Тесла ја укина можноста за купување на нејзините возила со биткоин поради загриженост за климатските промени, напиша тогаш извршниот директор Илон Маск на Твитер.

„Загрижени сме поради сѐ поголемата употреба на фосилни горива за трансакции и копање на биткоинот. Особено сме загрижени за јагленот, со најлоши емисии од сите горива. Криптовалутата е добра идеја, но не смее да предизвикува огромни еколошки проблеми“, напиша Маск.

Тој додаде дека Тесла не планира да продава повеќе од својот биткоин, но потврди дека компанијата разгледува други криптовалути што се многу помалку зависни од енергија.

Пред само три месеци, Маск, голем поддржувач на криптовалутите, откри дека Тесла вложила 1,5 милијарда долари во биткоини. Во март тој објави дека производителот на автомобили ќе ја прифаќа криптовалутата како платежно средство за скапите електрични возила на Тесла.

Најавите ги вивнаа цените на биткоинот во тоа време.