И 5.726 самохрани родители ќе добијат платежни картички

Во екот на комисиската расправа за ребалансот на Буџетот, СДСМ повика на негово изгласување за да може да се обезбедат 470 милиони евра за реализација на мерките од четвртиот пакет за помош и поддршка на стопанството и на населението.

– Измените и дополнувањата на Буџетот за 2020 година треба да бидат усвоени во Собранието за да можат 283.000 граѓани да добијат домашни платежни картички во вредност од по 6.000 денари. Домашни платежни картички ќе добијат 5.726 самохрани родители, како поддршка во справувањето со последиците од економската криза. Тоа ќе значи зајакнување на семејните буџети на повеќе од 5.700 семејства и поттикнување на приватната потрошувачка. Платежни картички ќе добијат и пензионерите со пензии пониски од 15.000 денари, пасивните баратели на работа, самостојни уметници, филмски работници, културни работници и естрадни уметници, како и 540 студенти, но и граѓаните кои се над 64 години, а немаат пензија, ниту државна социјална пензија и се со приходи пониски од 15.000 денари, или воопшто немаат приходи – информираа од СДСМ.