Косово чекор до визна либерализација

Амбасадорите на земјите-членки на Европската унија (ЕУ) на состанокот во Брисел на 20 декември го одобрија претходно постигнатиот договор меѓу Советот на ЕУ и Европскиот парламент за либерализација на визите за Косово, потврдија дипломатски извори од ЕУ, пренесува балканскиот сервис на РСЕ.

Ова е формален чекор кон финализирање на оваа одлука, која земјите членки ја договорија на 30 ноември. Според процедурата, чешкото претседателство со Унијата во име на Советот на ЕУ влезе во преговори со Европскиот парламент и по само една средба беше постигнат договор меѓу овие две институции на ЕУ.

Преговорите во име на Европскиот парламент ги водеше известувачот за визна либерализација за Косово, Тијс Ројтен од Холандија.

Иако Собранието би сакало одлуката да биде безусловна и побрзо да стапи во сила, оваа институција на ЕУ го усогласи текстот на одлуката за да не се создадат околности кои дополнително ќе го одложат процесот.

Овој договор сега мора да биде изгласан од Комитетот за правда и граѓански слободина Европскиот парламент, а потоа да оди на пленарна седница. Се очекува оваа постапка да биде во првата половина на следната година.

Европскиот парламент досега изрази силна поддршка за визната либерализација на Косово. Парламентот изврши притисок и врз земјите од ЕУ што поскоро да ја прифатат одлуката за укинување на визите за граѓаните на Косово, земја чии граѓани се единствените од Западен Балкан кои не можат да патуваат во ЕУ без визи.

Визната либерализација ќе им овозможи на граѓаните на Косово слободно да патуваат во земјите од Шенген зоната, која се состои од 26 европски земји.