Кумановскиот театар ги повика децата и возрасните, онлајн да ја проследат детската претстава „Волшебникот од Оз”

7

Кумановскиот театар од денеска почна со прикажување онлајн претстави на facebook профилите на Театар Куманово и НУЦК „Трајко Прокопиев”, информираа денеска надлежните од оваа установа.

Прва е прикачена детската претстава „Волебникот од Оз”, а во следните денови, најави директорот на установата, Сашо Тодоровски, онлајн ќе можат да се гледаат претставите „Ревизор”, „Јованче и Марика”, „Бегај, еве ја жена ти”, „Околиска болница”.

-Ги поканувам децата и родителите да ја проследат претставата, да коментираат и да предложат нова претстава која ќе ја реализираме во иднина, изјави Тодоровски.

Од Центарот за култура Куманово, посочуваат дека Театар Куманово со години наназад работи на детски претстави и зајакнување на репертоарот за деца.

-Најмалите се наша значајна публика и поддржувањето на нивниот воспитно-образовен процес е нешто што ние го работиме со многу љубов. Затоа, во овие денови без училиште, повелете на нашиот online настан и погледнете една од нашите најпопуларни детски претстави. Од денес до петок можете да ја гледате на следниов линк: https://youtu.be/7nixc4yRxPk. Останете дома со вашите деца и уживајте во нашата сценска приказна, повикаа од театарот.

„Волшебникот од Оз” премирно беше изведена во 2016 година. /МИА