Кујтим Фејзулаи со потекло од тетовски Челопек е терористот од Виена во чиј напад загинаа 4-ца граѓани по улиците на австрискиот главен град

136

Со потекло од село Челопек во тетовско, во општина Брвеница. Во македонските служби немало податоци за негово екстремистичко однесување. Ова е првичниот профил на Кујтим Фејзулаи кој според австриските власти е убиениот терорист во Виена и учесник во големите напади со огнено оружје во центарот на австрискиот главен град.

Веднаш откако австриската полиција го застрелала и го утврдила неговиот идентитет, ја известила и полицијата во Македонија, а сега надлежните го проверуваат македонскиот државјанин.

Кујтим Фејзулаи според првичните информации имал 20 години, бил осуден на 22 месеци затвор лани поради намера да се бори за исламската држава. Како млад затвореник бил помилуван и пуштен во декември од затвор. Имал двојно државјанство, австриско каде е роден и каде живеел со родителите, но успела да извади и македонско државјанство.

На сликите кои се објавени и се симнати од безбедносните камери се гледа вооружен маж со маска кој се движи низ улиците и пука во луѓето кои се шетале низ Виена. На една фотографија се гледа како терористот со пиштол застрелува легнат маж, а првичните сомнежи се дека станува збор за македонскиот државјанин Кујтим Фејзулаи.

Вчера за време на нападот носел лажен елек како бомбаш самоубиец и пукал со автоматска пушка, а со себе носел и пиштол и мачета. Во нападот се убиени 4 граѓани, а полицијата го застрелала напаѓачот. Сега траат претреси во местата каде се движел Фејзулаи и дали имал соработници.

-Синоќа бевме сведоци на напад од барем еден исламистички терорист. Ваква ситуација последните десет години во Австрија не сем доживеале, изјави Карл Нехамер, австриски министер за внатрешни работи.

Најмалку дваесетина се ранети, од кои седум луѓе се во тешка состојба во болница. Очевидците опишуваат дека пукањето почнало одеднаш и настанал хаос.

-Ненадејно почна пукање – прво не зневме за што се работи, но наеднаш луѓето кои се деа на терасите со други гости почнаа да бегаат. Прво стоевме бидејќи не знаевме што се случува, а потоа повторно започна пукање, но поблиску, па почнавме да бегаме. Бидејќи не знаевме да трчаме во вистинската насока, налетавме во хотелот и таму се сокривме, изјави студентката Евелин, веднаш по нападот.

Нападот се случил неколку часа пред новото затворање на Австрија поради високите бројки на заразени од Ковид. Местото на нападот е во близина на виенската синагога и се истражува дали верскиот објект кој не работел бил првична цел на терористот.