Маричиќ: Северна Македонија ја има Грција за партнер и силен поддржувач на европскиот пат

 

Северна Македонија ја има Грција за партнер и силен поддржувач на европскиот пат, напиша на Фејсбук заменик- претседателот на Владата задолжен за европски прашања Бојан Маричиќ, по средбата во Атина со алтернативниот министер за надворешни работи на Грција Милтиадис Варвициотис.

Маричиќ истакна дека имале значаен и содржаен состанок и разговарале на важни теми за двете земји, но и за случувањата во регионот.

-Денешната посета е уште една потврда за постоење на добра политичка волја и потенцијал за меѓусебна соработка во остварувањето на заедничките стратешки цели и нови инфраструктурни проекти кои ќе ја зголемат мобилноста на нашите граѓани, како отворањето на граничниот премин Маркова Нога за кој веруваме дека ќе има успешна реализација и брзо и ефикасно отворање, напиша Маричиќ на Фејсбук.

Додаде дека добрососедските односи и поддршката од Грција „отвораат простор да се фокусираме и да зборуваме за европската иднина и за македонските евроинтеграции“.

Алтернативниот шеф на грчката дипломатија на Твитер напиша дека „европскиот пат на Северна Македонија е поврзан со целосна имплементација на Договорот од Преспа“.