Медведев беснееше на теренот

4

Данил Медведев мораше добро да се испоти на австралиското сонце за да се пласира во четврт-финалето во Мелбурн.

Го победи по три и пол часа игра Максим Креси од САД со 6:2, 7:6 (4), 6:7 (4), 7:5.

Во текот на мечот имаше низа фрустрирачки детали, а му пречеше што противникот одолжува со сервирањето, и тоа така што полека одеше да земе пешкир.

„Јас не можам ни да одам да се измо*ам, а тој го има целото време на светот. Кој ги смислува овие правила?“, се лутеше Данил.

Му пречеше и начинот на кој играше Креси, кој му праќаше жестоки сервиси, а потоа сѐ решаваше со волеи на мрежата.

„Ова е смртно досадно“, се пожали Русинот.

Во четвртиот сет Креси најде ритам во својата игра и на Медведев не му се допадна што мечот се одолжи.

„Просто е неверојатно колку среќа има тој. Вакво нешто не сум видел во мојот живот”, се пожали Русинот поради тоа што Максим ги погодуваше линиите.

Во секој случај, тој најде начин да го освои четвртиот сет и да избегне да игра и петти.

Тоа секако ќе му биде важно пред продолжението на турнирот, бидејќи во четврт-финалето ќе има тешка задача со Феликс Оже-Алиасим.