Мицевски: Власта сака со европско знаменце да го протне Законот за марихуана

Власта преку владејачкото мнозинство во Собранието има намера да протне 12 нови закони злоупотребувајќи го европското знаменце, со цел законите да бидат донесени без отворена дебата и суштинска дискусија, изјави на прес-конференција во Собранието шефот на пратеничката група на ВМРО-ДПМНЕ Никола Мицевски. Тој нагласи дека меѓу законите на кои им е ставено знаменцето е и Предлог – законот за контрола на опојни дроги попознат како закон за марихуана.

„Колку за информација, овој предлог-закон, за марихуаната, власта предводена од Заев упорно се обидува да го протне во Собранието со една и единствена цел, а тоа е интересот на фамилијата Заеви, познати во бизнисот со производство и доделување на лиценци за одгледување на марихуана“, рече Мицевски.

Тој додаде дека европско знаменце е ставено и на обемниот Закон за парнична постапка кој што има повеќе од 500 членови.

„За да биде појасно, проблемот во постапката со овој Закон е тоа што усогласувањето со правото на ЕУ се однесува на само неколку членови од вкупно пет стотините. Ова е класична злоупотреба на европското знаменце и демонстрирање на самоволие од страна на власта“, нагласи Мицевски.

Според него, спорено е и законското решение за Академијата на судии и јавни обвинители, кој пред десетина дена бил повлечен од редовна постапка и „волшебно преку ноќ добил европско знаменце“, зашто некому му се брзало со избор на нови судии и обвинители.

„Доколку, СДСМ, Заев и владејачкото мнозинство не не се повлечат од налудничавите идеи, је го блокираме Собранието на Република Македонија и носењето на секаков вид на закони. Нема да дозволиме материјалните, финансиските, тесно-партиските и коалициските интереси да бидат пред интересите на граѓаните“, рече Мицевски.