Навални: ЕУ бара од Москва „независна истрага“

6

Европската унија врши притисок во случајот со рускиот опозиционер Алексеј Навални, за кого постојат индиции дека е отруен. Шефот на дипломатијата на ЕУ, Борел порача дека очекува разјаснување од Москва и тоа неодложно.

Европска унија „силно го осудува“ она што изгледа дека е обид за убиство на рускиот опозиционер Алексеј Навални и ја повикува Русија без одлагање да започне истрага за неговото труење, соопшти шефот на европската дипломатија Жозеп Борел.

Тој во соопштение објавено на интернет сајтот на неговата служба укажа дека прелиминарните резултати од универзитетската болница Шарите во Берлин укажуваат на тоа оти Навални е отруен за време на посетата на Сибир. Борел изрази благодарност до германската болница поради негувањето на Навални, а нему му посака брзо да закрепне.

„Европска унија силно го осудува она што изгледа дека е обид за убиство на Навални. Неопходно е руските власти без одлагање да започнат независна и транспарента истрага за труењето на Навални. Рускиот народ како и меѓународната заедница бараат да ги дознаат фактите за труењето на Навални. Одговорните за тоа мораат да одговараат“, пишува во соопштението на Борел.

Клиниката „Шарите“ во Берлин, каде истакнатиот критичар на рускиот претседател Владимир Путин се лекува уште од саботата, по спроведените сопствени детални тестови, исто така наведува дека има индиции оти 44-годишниот политичар е отруен. Ова го соопшти портпаролката на клиниката.

Клиниката соопшти дека Навални сè уште е во вештачка кома. „Неговата здравствена состојба е сериозна, но во моментов нема акутна опасност за неговиот живот“. Клиничките наоди укажуваат на труење „од супстанција од групата активни супстанции наречени инхибитори на холинестераза“. Конкретната супстанција сè уште не е позната.