Над 9 илјади граѓани годишно ја напуштаат државата

Во земјава нема прецизни податоци, колку граѓани ја напуштаат на годишно ниво, ниту пак се знае нивниот профил. Но, според истражувањето на организацијата за економија „OECD“, бројките велат дека околу 9 000 до 9500 граѓани се отселуваат секоја година од државата. Најмногу од нив заминуваат во европските земји, а помалку во Америка и Австралија, велат во Агенцијата за иселеништво. Од таму објаснуваат дека бројот на иселени граѓани , според добиените статистики од странство се движи над половина милион луѓе.

Имаме во иселеништво државјани на РСМ, од прилика 500-600 илјади. Значи веќе тоа е проблем, кој според мене е доцна да работиме само на случајот за спречување на иселување и на младите, тој бреин дреин. Веќе треба да почнеме да размислуваме и да правиме реална стратегија , како да ги анимираме тие иселеници да ни помогнат и да ги користиме нивните капацитети кон државата, изјави Никола Шалваринов- директор на Агенција за иселеништво.
Главна причина за иселувањето е економскиот фактор . А, 48% од младите се изјасниле дека се иселиле за подобар живот , велат од Фондацијата за демократија на Вестминстер. Според нивните истражувања, со иселувањата, државата годишно губи стотици милиони евра, вложени во развојот на граѓаните и во нивното образование.

Околу 330 милиони евра потенцијален БДП годишно е она што го изнесуваат луѓето и околу 500 милиони евра-пари вложени во образованието. Тоа е она што се губи, вели Дамир Незири-Фондација за демократија на вестминстер.
Од Мрежата за спречување на одлив на мозоци велат дека има пропусти во имплементацијата на усвоената во 2013, Национална стратегија за вмрежување и соработка со високо образовниот кадар. Затоа бараат подобрување на мерките за вработување на младите.

Од една страна, поголеми вработувања на младите, од друга страна, намалување на стапката на невработеност. И од трета страна, да се гарантираат квалитетни работни места, рече Илија Станковски- Мрежа за спречување на одлив на мозоци.
Од МОН, решавањето на проблемот со иселувањето , го гледаат во реформите во средното стручно образование кои започнаа да се применуваат во оваа учебна година. А, од Агенцијата за иселеништво, очекуваат резултати од изготвената Национална стратегија за комуникација и соработка со дијаспората.