Одложени денешното и наредното рочиште за случајот „ТНТ“

Денешното рочиште за случајот „ТНТ“, како и наредното што беше закажано за 11 ноември, нема да се одржат поради здравствени пречки на надлежниот обвинител, соопшти Основен кривичен суд Скопје.

Во соопштението од судот се наведува дека странките се веќе известени, а продолжението на главната расправа за „ТНТ“ ќе биде закажано откако за тоа ќе бидат створени услови.

Случајот „ТНТ“ се однесува за уривањето на комплексот „Космос“ на инвеститорот Фијат Цановски. За делото се обвинети повеќе лица, меѓу кои и поранешниот министер за транспорт и врски Миле Јанакиески и тогашниот градоначалник на Општина Гази Баба, Тони Трајковски, додека во отсуство му се суди на поранешниот премиер Никола Груевски.