ОЕЦД: Пандемијата предизвика неочекувано голем економски пад

Организацијата за економска соработка и развој (ОЕЦД) соопшти дека нејзините 37 членки бележат невиден економски пад од 9,8 проценти во вториот квартал во однос на претходниот квартал, како последица на пандемијата со коронвирусот.

Притоа се истакнува дека актуелната економската криза далеку го надмина падот на БДП од 2,3 отсто, забележан во првиот квартал на 2009 година, во екот на глобалната финансиска криза.

Меѓу земјите од групата седум најразвиени економии во светот кои се членки на ОЕЦД, досега најголем пад на БДП имаше Велика Британија, од 20,4 проценти.

Следува Франција со пад од 13,8 проценти во вториот квартал.

Италија забележа пад на економијата од 12,4 проценти, Канада 12 проценти и Германија 9,7 проценти, соопшти ОЕЦД.

САД имаат поблаг пад од 9,5 проценти во вториот квартал.

Во Јапонија, каде што, како што наведува ОЕЦД, мерките за затворање биле помалку строги, БДП паднал за 7,8 проценти во вториот квартал.

СПОДЕЛИ