Полицијата уби четворица мажи осомничени за силување и убиство на жена во Индија

Индиската полиција застрела четворица мажи осомничени за силување и убиство на млада жена минатата недела во јужна Индија, објави Би-би-си.

Осомничените се наоѓале во притвор, а утрово биле однесени на местото на убиството на жената, каде биле застрелани, откако, според информациите од полицијата, се обиделе да го украдат оружјето од полицајците и да избегаат.

Шефот на полицијата изјавил дека ги однеле обвинетите на местото на настанот да го реконструираат она што се случило.

„Полицијата пукала кон нив кога се обиделе да ги зграбат пиштолите на офицерите и да побегнат“, рекол тој. Во инцидентот, повредени се и двајца полицајци.

Изгореното тело на 27-годишната жртва беше пронајдено минатата недела и тој инцидент предизвика бес и протести ширум Индија поради наводна неактивност на полицијата.