Почина 27-годишната родилка од Куманово , новороденчето е добро

Ден по породувањето, родилката со драстично влошена клиничка слика била префрлена на Инфективната клиника но агресивноста на вирусот се покажала фатална по нејзиниот живот, информираат здравствените власти. Бебето е негативно на КОВИД-19, во добра здравствена состојба и под постојан надзор на интензивниот оддел на клиниката.

Кумановката е третиот регистриран смртен случај денеска откако претходно Министерството за здравство информираше за уште двајца починати пациенти. Едниот е маж од Куманово на возраст од 73 години, другиот е 44-годишник чие безживотно тело било пронајдено во неговиот дом во Кавадарци.

Со ова, вкупната бројка на починати од КОВИД-19 во земјава е 29.

Од направениот 351 тест изминатово деноноќие, уште 18 лица се позитивни на корона. Бројката на заразени се искачи на 617.

Нови 18 случаи на корона вирус:

Скопје – 7

Прилеп – 4

Куманово – 2

Битола – 2

Кавадарци – 1

Крушево -1

Кочани – 1

Најмногу од новозаразените се од Скопје – 7 лица. Во Прилеп се регистрирани 4, во Куманово и Битола 2, а во Кавадарци, Крушево и Кочани по еден новозаболен.

Главниот град останува на врвот на листата со најмногу заразени од КОВИД-19, вкупно 261 лице. Потоа следува Куманово со 130 заразени, Дебар со 49, Прилеп со 38 и 20 заразени во Штип.

Од Инфективната клиника во Скопје по направени два негативни контролни теста пуштени се 5 пациенти, а примени се нови 4, со што на клиниката во моментов се хоспитализирани 66 пациенти. Од нив, 7 се на механичка вентилација.