Принцот Филип, сопругот на кралицата Елизабета, почина на 99 години

Принцот Филип, војводата од Единбург и сопруг на британската кралица Елизабета Втора, почина на 99-годишна возраст. Бакингемската палата ја потврди неговата смрт.

Војводата од Единбург, кој беше во брак со британската кралица 73 години, почина на 99-годишна возраст.

Знамињата на значајните згради во Велика Британија се спуштени на половина копје, а најавен е период на жалост.

Здравствената состојба на принцот Филип веќе некое време полека се влошуваше. Тој во мај 2017 година најави дека се повлекува од кралските ангажмани, шегувајќи се дека веќе не може да стои. Последниот официјален јавен настап му беше подоцна истата година за време на парадата на Кралските маринци во дворот на Бакингемската палата.