Чулев за Фокус: Возилата се користеле несоодветно и досега само едно е вратено

19

Техничкиот министер за внатрешни работи Наќе Чулев кој вчера попладне испратил телеграма во Министерството за внатрешни работи и бара да се вратат триесетина возила меѓу кои и возила што ги користело обезбедувањето на неговиот претходник и сегашен технички премиер, Оливер Спасовски, во изјава за Фокус вели дека возилата се користеле несоодветно и тврди дека телеграмата била испратена во рамките на постапувањето согласно процедурите.

– Постапување согласно законите, процедурите и позитивните законски прописи е начинот на кој што работи актуелното раководство на Министерството за внатрешни работи. Водењето сметка за инвентарот и опремата на министерството за внатрешни работи не е ‘спорна одлука’ туку само е еден дел тоа постапување. Без да сакаме да навлеземе во дневно политички интриги креирани од партиските кујни на СДСМ, најостро ги демантираме наводите и невистините објавени во текстот и апелираме до медиумите и новинарите да ги почитуваат принципите на етичко известување. За волја на вистината од десетици возила за кој е утврдено несоодветно користење, само едно е вратено, а останатите сеуште се користат надвор од правилата и процедурите на МВР, вели Чулев во изјава за Фокус.

Дополнителната заменик министерка, Славјанка Петровска потврди дека има ваква телеграма и дека Чулев бара да се врати едно возило кое го користела токму таа, како и неколку возила кои ги користел Спасовски. Таа не успеала да добие одговор дали станува збор за превид на министерот.

Оваа телеграма на Чулев е втора по ред, откако претходно побара раководителите на организациските единици во рамките на МВР да не ги врачуваат решенијата за распределување на работници кои ги потпишал Спасовски.

Двајцата министри вчера се „судрија“ и околу предлогот на Чулев за началник на СВР Скопје да биде именува Ристо Ставревски, советник на поранешната министерка Гордана Јанкулоска, кој се слуша во „бомбите“ како договара изборни манипулации. Петровска не го потпиша ова решение, кое е дел од смените кои му се дозволени на техничкиот министер, но неговото име беше официјално објавено на списокот на МВР.