Шилегов: Јас многу ретко пијам алкохол, а секоја втора пијандура во државава мене ме вика – пијандура!

За време на вечерашното гостување на Алфа телевизија, градоначалникот на Град Скопје, Петре Шилегов, инсистираше да одговори на едно непријатно прашање, поставено од твитер заедницата.

Еден гледач се интересирал од која ракија најмногу го болела глава Шилегов, кој рече дека тоа е црна кампања против него.

– Во тоа време, кога бев жесток перјаник на опозицијата, тогашната власт не можеше да најде слаба точка на Петре Шилегов, и почна црната пропаганда дека сум алкохоличар. Јас гледам дека тоа се случува. Тоа е црна кампања, а јас многу ретко пијам алкохол. А секоја втора пијандура во оваа држава мене ме вика – пијандура! Кога сте инфериорен интелектуално, материјално, кога сте неуспешен во животот, а гледате некој на телевизија сосема опозитен од вас, тогаш ви е најлесно да кажете – овој е пијандура! – одговори Шилегов.