Јужнокорејски суд осуди поранешен министер на две години затвор

 

Јужнокорејски суд денеска го осуди поранешниот министер за правда Чо Кук на две години затвор, откако беше прогласен за виновен за издавање лажни акредитиви за да им помогне на своите деца да влезат во престижни училишта, што ја потресе претходната влада и предизвика масовни протести.

Чо, исто така, беше прогласен за виновен за злоупотреба на овластувањата додека служеше како висок помошник на поранешниот јужнокорејски претседател Мун Џе-ин за блокирање на истрагата против поранешен функционер на Комисијата за финансиски услуги близок до Мун, кој на крајот беше уапсен под обвинение за поткуп.

Централниот окружен суд во Сеул сепак одлучи да не го уапси веднаш Чо бидејќи немало закана за негово бегство и затоа што неговата сопруга веќе издржувала затворска казна поради обвиненијата поврзани со нивните деца.

Чо на новинарите по пресудата им рече дека планира да поднесе жалба, а доколку го стори тоа во рок од седум дена, ќе остане надвор од затвор барем додека не се реши жалбата. „Ќе ги обжалам обвиненијата и ќе дадам поискрен аргумент на суд“, рече тој.

Чо прво беше висок секретар на Мун за граѓански прашања пред да биде именуван за министер за правда во 2019 година.

Сепак, тој беше принуден да поднесе оставка неколку месеци откако се појавија наводи дека се договарал со сопругата за да фалсификува документи и уверенија за да и помогне на нивната ќерка да влезе во медицинско училиште. Двојката подоцна се соочи со слични обвинувања во врска со образованието на нивниот син.

Чо се извини за привилегиите што ги добила неговата ќерка откако тој поднесе оставка како министер за правда, но цврсто негираше дека сторил нешто лошо.