Претседателот на ВМРО-ДПМНЕ Христијан Мицкоски денеска заедно со секретарот за меѓународна соработка Стефан Андоновски оствари средба со амбасадорот на Полска во земјава, Војциех Тицињски, на која разговараа за актуелната политичка и економска состојба и евроинтегративниот процес на земјата.
Во однос на политичките случувања, претседателот Мицкоски нагласил дека земјата тоне во криминал и корупција, додека граѓаните живеат се посиромашно, соопшти прес-службата на партијата.
-Се случува дуизација, корупцијата цвета како никогаш до сега, а Ковачевски е директно одговорен за сите скандали, и токму затоа државата е оценета негативно по сите параметри, а тоа го потврдуваат и сите меѓународни истражувања. Решението од ваквата ситуација е одржување на предвремени парламентарни избори кои ќе донесат промена и нова иднина и надеж за сите граѓани, истакна на средбата Мицкоски.
Воедно, уште еднаш беше потврден ставот на партијата, а тоа е дека нашата држава мора да биде дел од големото европското семејство, но без дополнителни уцени и барања од бугарска страна.
Соговорниците се согласиле да ја продолжат работата и меѓусебната соработка, стои во соопштението на ВМРО-ДПМНЕ.
