Од: Михалис Рокас и Лариса Дир
ЕУ продолжува со својата непоколеблива поддршка за Украина да постигне сеопфатен, праведен и траен мир заснован на начелата на Повелбата на ООН и меѓународното право. Нашата визија за мир е јасна: Не може да има преговори за Украина без Украина, исто како што не може да има преговори што ја засегаат европската безбедност без Европа.
Овие денови се одбележуваат два значајни настана од европската историја: на 8 мај го прославивме Денот на сеќавање и Победа над нацизмот, денот кога пред 80 години заврши Втората светска војна во Европа. Денеска, на 9 мај, го одбележуваме Денот на Европа. Го славиме раѓањето на една мирољубива, обединета и просперитетна Европа. Точно пред 75 години, во периодот по најкрвавиот конфликт во историјата на човештвото, францускиот министер за надворешни работи Роберт Шуман ја претстави својата визија. Во центарот на оваа визија беше замена на конфликтот со соработка; обединување на поранешни противници и надминување на споровите од минатото; промовирање на мир и стабилност, просперитет и демократија. Ова е визијата од која се роди Европската Унија.
За време на Втората светска војна, Украина беше едно од главните боишта и претрпе големи загуби во тој конфликт, а денес, за жал, визијата на основачите на ЕУ повторно е суштински оспорена од тековната руска воена агресија против Украина.
Русија го врати теророт и пустошот на европско тло, предизвикани од војна, со намера да ја избрише Украина или барем да ја лиши од сувереното право да ја избере својата иднина. Руските напади убиваат мажи, жени и деца без разлика, што е очигледно кршење на меѓународното право. Нападите со ракети и дронови, што ги лансира агресорот, намерно се насочени кон цивилни цели и критична инфраструктура. Соочен со агресијата, украинскиот народ покажа херојска храброст во одбраната на својата земја. Но, Украинците не ја бранат само својата татковина. Тие ја бранат слободата на цела Европа. Им оддаваме почит на сите што ги загубија животите и сочувствуваме со оние што ги загубија своите блиски во оваа борба.
Во последните месеци многу се зборува за мир. Никој не сака крај на војната и страдањата повеќе од самите Украинци. Но, што видовме во практика? Додека претседателот Зеленски го прифати американскиот предлог за 30-дневен прекин на огнот во војната на Русија против Украина, Москва не возврати. Напротив, Русија постојано покажува дека нема интерес за мир, продолжувајќи со неодговорни напади врз Кривуј Рог, Сума, Киев, Днепар, Харков, Херсон, Одеса и други градови. И нејзината воена пропаганда и дезинформации, кои се стремат да ја префрлат вината за војната, да ја нормализираат окупацијата и да ги оправдаат или дури и да ги негираат извршените злосторства.
Војната што ја започна Русија, мора да се заврши на таков начин што ќе овозможи праведен и траен мир во согласност со меѓународното право и Повелбата на ООН и ќе ја почитува независноста, суверенитетот и територијалниот интегритет на Украина во рамките на нејзините меѓународно признати граници. Сите затвореници и заложници мора да бидат вратени дома, киднапираните украински деца мора да бидат повторно обединети со своите родители или роднини. Сите сторители на злосторствата извршени во Украина, вклучително и руското раководство, мора целосно да сносат одговорност за прекршување на меѓународното право. Украина мора да биде обесштетена за материјалната штета што ја претрпе земјата.
Report Ad
И конечно, самата Украина мора да добие сигурни меѓународни гаранции дека таква агресија никогаш повеќе нема да се случи.
Во оваа ситуација, ЕУ продолжува со својата непоколеблива поддршка за Украина да постигне сеопфатен, праведен и траен мир заснован на начелата на Повелбата на ООН и меѓународното право. Нашата визија за мир е јасна: Не може да има преговори за Украина без Украина, исто како што не може да има преговори што ја засегаат европската безбедност без Европа. Секој прекин на огнот мора да биде взаемен и праведен и да биде дел од поширок мировен процес. Во овој процес, Украина треба да добие силни и веродостојни безбедносни гаранции за да се спречи идна агресија. Конечно, мирот мора цврсто да го поддржи територијалниот интегритет, суверенитет и независност на Украина и да ѝ овозможи на Украина сама да ја избере својата иднина.
Нашата цел е да ја ставиме Украина во позиција на сила за да се постигне праведен и одржлив мир. За да го постигнеме тоа, ЕУ е подготвена целосно да учествува во поддршката на претстојните чекори, заедно со Украина, Соединетите Американски Држави и другите партнери, вклучително и Северна Македонија, која покажа лидерство преку својата поддршка за Украина. Оддаваме признание на одлуката на Северна Македонија за усогласувањето со санкциите на ЕУ против Русија, како и за воената и хуманитарна помош.
Понатаму, проширувањето на Европската Унија има стратешко значење за обезбедување долгорочен мир, безбедност и просперитет на целиот континент. Украина и Северна Македонија се неопходни учесници во оваа историска заложба.
Пристапувањето на Северна Македонија ќе ги зајакне мирот, безбедноста и стабилноста во Југоисточна Европа, ќе ја олесни соработката во внатрешната безбедност и управувањето со границите, ќе ги зголеми економските можности, како и транспортната и енергетската поврзаност.
Report Ad
Пристапувањето на Украина во иднина значително ќе ја зајакне геополитичката отпорност на Европската Унија, ќе придонесе за европската и глобалната безбедност на храната, ќе ја зајакне енергетската независност и ќе ги одржи демократските вредности во должина на источната граница на Унијата.
Иднината на Европа се темели на единство и солидарност. Со прифаќање на земјите што ги делат европските вредности и аспирации и со постојана поддршка на нивниот пат на реформи и модернизација, ние градиме посилна, побезбедна и поотпорна Европска Унија за идните генерации.
Денес, додека ја чествуваме визијата на нашите основачи за мирна, обединета и просперитетна Европа, повеќе од кога било ја нагласуваме важноста на одржувањето на солидарноста со Украина. Имено, Украина се наоѓа на првата линија во борбата за зачувување на таа визија. За сите нас во Европа.
Специјално за „KOHA“
(Автори се Михалис Рокас, амбасадор на ЕУ и Лариса Дир, амбасадорка на Украина)
