Лени Клум, ќерката на славната манекенка Хајди Клум, го прослави својот 21. роденден. Нејзината мајка ѝ упати посебна честитка, споделувајќи емотивни спомени од раното детство на Лени.
„Среќен роденден, Лени. Те сакам со сето мое срце“, напиша 51-годишната Хајди во објава на Инстаграм, каде што објави две фотографии од периодот кога Лени била бебе. На една од нив, манекенката ја бакнува ќерка ѝ по челото, а на другата е насмеана во болнички кревет, со новородената Лени во прегратка.
Хајди во своите Инстаграм сториња објави и фотографија направена во Њујорк, каде што шета со малата Лени закачена на нејзините гради.
Покрај Лени, Хајди со својот поранешен сопруг, музичарот Сил, има уште три деца – Хенри (19), Јохан (18) и Лу (15). Парот објави дека се разделува во јануари 2012 година, а разводот официјално беше финализиран во октомври 2014.
Хајди и Лени се познати по нивната блиска врска. Во октомври 2022 година, во интервју за „Пипл“, Лени зборуваше за тоа како е да се расте и да се гради кариера во истата индустрија како и нејзината славна мајка. „Тоа е факт – моите родители се познати“, рече таа, осврнувајќи се на статусот на т.н. „непо бејби“, што значи дете на славни личности кои имаат повластен почеток во кариерата.
„Добив помош на почетокот и свесна сум дека многумина сонуваат за таков старт. Многу сум благодарна што можев да го искористам она што мама ми го овозможи“, додаде Лени.
„Но сега работам самостојно, вложувам труд и време. Патувам сама, одам на факултет. Мама и јас едноставно ја споделуваме истата љубов кон истата работа“, заклучи Лени.
