Oд 15:30 часот денеска на Светското првенство се одиграа уште два натпревари во кои победи забележаа селекциите Бразил и Словенија кои играа против Чиле и Аргентина.
Бразил влезе како фаворит во натпреварот против Чиле и во првото полувреме доминираа во најголем дел од времето, па така во еден момент водеа и со шест гола разлика (13:7).
Сепак, Чиле со една серија од 3:0 пред одморот успеа да намали на 10:13. Во второто полувреме Чилеанците не се откажуваа и стигнаа и до „минус 1“ (21:20), сепак Бразил тука како одново да „додаде гас“ и обезбеди победа од 28:24.
Доминантен натпревар одигра и Словенија против Аргентина. Тука ракометарите на фаворитот победата ја најавија по првите 30 минути во кои имаа водство од 15:8.
Во вториот дел Аргентина ниту еднаш не успеа резултатски посериозно да се доближи, па Словенија запиша триумф од 34:23.
