Германскиот претседател Франк-Валтер Штајнмаер и министерот за одбрана Борис Писториус денеска ќе присуствуваат на церемонија во седиштето на НАТО во Брисел по повод 70 години од приклучувањето на Германија кон алијансата, јави ДПА.
Домаќин на настанот ќе биде генералниот секретар на НАТО, Марк Руте.
Германија стана 15-та членка на трансатлантскиот одбранбен сојуз на 6 мај 1955 година. Денес, НАТО брои 32 членки.
Празничната атмосфера сепак е засенета од тековната војна во Украина и од неизвесноста за иднината на алијансата. Според ДПА, НАТО се соочува со големи турбуленции, особено поради одлуката на Вашингтон значително да ја намали својата улога во безбедноста на Европа.
Претседателот на САД, Доналд Трамп, неодамна порача дека европските сојузници самите треба да ја преземат одговорноста за конвенционалната одбрана на континентот, додека нуклеарното одвраќање ќе остане непроменето.
Минатата година, американските средства за одбрана сочинуваа над 60 проценти од вкупните трошоци за одбрана на НАТО-членките. Сега, од европските земји се очекува да го зголемат својот удел и да вложат значителни финансиски средства во одбраната и модернизацијата.
Церемонијата за 70-годишнината се организира пред 6 мај за да можат да присуствуваат и Штајнмаер и Руте. Дополнително, според плановите, на 6 мај германскиот парламент треба официјално да го избере лидерот на Христијанско-демократската унија (ХДУ), Фридрих Мерц, за нов канцелар.
