Европската комисија денеска го објави конкурсот за избор на Европска престолнина на паметниот туризам и на Европски зелен пионер на паметниот туризам за 2026 година.
На конкурсот можат да учествуваат сите туристички дестинации од Европа, кои треба да ги достават своите иновативни практики за паметен и одржлив туризам со што ќе станат водечки примери во овој сектор.
При изборот на Европската престолнина на паметниот туризам, градските туристички дестинации кандидати ќе се оценуваат за извонредни достигнувања во четири категории: одржливост, пристапност, дигитализација и културно наследство и креативност. За оваа титула може да конкурираат европски градови со население од над 100.000 жители.
За титулата, пак, Европски зелен пионер на паметниот туризам можат да се натпреваруваат населени места со од 25.000 до 100.000 жители, кои успешно имплементирале практики за зелена транзиција за промовирање на одржлив туризам.
Рокот за пријавување на конкурсот почнува од денеска и ќе трае до 30 мај 2025 година во 17:00 часот по средноевропско време.
Според еврокомесарот за одржлив транспорт и туризам, Апостолос Ѕиѕикостас со доделување на овие признанија на градовите кои успешно го прифатиле паметниот, одржлив и напреден туризам, ЕУ сака да ги инспирира другите населени места да го следат нивниот пример.
– Победници дават моќен пример, покажувајќи дека туризмот може да напредува со почитување на локалните заедници и зачувување на уникатниот идентитет на секој град. Со нетрпение очекуваме да ги добиеме вашите апликации, порача Ѕиѕикостас по повод објавувањето на конкурсот.
