ЕИБ: Нови проекти и помош за Западен Балкан поради војната во Украина

Потпретседателката на Европската инвестициска банка (ЕИБ) Лилјана Павлова денеска на самитот ЕУ-ЗБ во Тирана вети помош на банката за решавање на итните краткорочни потреби на регионот што произлегуваат од руската војна во Украина.

Таа поддршка ќе се материјализира преку нови проекти кои ЕИБ Глобал планира да ги финансира во регионот, за воведување чиста енергија, проширување на електроенергетските мрежи и складишната инфраструктура, како и за поддршка на приватниот сектор во спроведувањето на мерките за енергетска ефикасност.

Павлова потврди дека ЕИБ е целосно усогласена со пакетот енергетска поддршка во вредност од една милијарда евра што го објави Европската комисија и има намера да одигра клучна улога во неговото спроведување.

„Драго ни е што пакетот содржи помош за поддршка на подобрувањето на политиката, законодавната и институционалната рамка на енергетскиот сектор. Подобрувањата во тие области ќе имаат позитивно влијание врз брзината со која ЕИБ Глобал и нашите локални партнери можат да започнат инфраструктурни инвестиции или да обезбедат финансирање на приватниот сектор“, рече Павлова.

Покрај поддршката во областа на енергетиката, банката на ЕУ, како што најави, ќе ја интензивира својата сеопфатна мешавина на заеми, комбинирајќи средства и советодавни услуги и ќе распореди повеќе експерти на терен за поддршка на поврзувањето, зелената и дигиталната транзиција и образованието и здравствените сектори.

ЕИБ, исто така, ќе се фокусира на промовирање на раст, дигитализација и декарбонизација на приватниот сектор.