Кина повторно испрати воени бродови во близина на Тајван

Кина денеска повторно испрати воени бродови, хеликоптер и борбен авион во близина на Тајван, втор ден по средбата на тајванската лидерка и претседателот на Претставничкиот дом на САД, соопшти тајванското Министерство за одбрана.

Три кинески воени бродови поминаа низ водите околу автономниот остров, соопшти Министерството, додавајќи дека борбен авион и хеликоптер поминале низ зоната за воздушна одбрана на Тајван.

Тајван вчера забележа три кинески воени бродови и хеликоптер, а на 5 април неколку часа пред средбата во Калифорнија помеѓу Цаи Инг-вен и Кевин Мекарти и кинеската носач на авиони Шандонг помина низ водите југоисточно од Тајван кон западен Пацифик.

Цаи е на еднонеделна турнеја низ САД и Централна Америка.

Тајван е самоуправен регион со демократски избрана администрација уште од граѓанската војна во Кина во 1949 година, а комунистичка Кина овој остров го смета за своја територија и смета дека секоја интеракција меѓу тајванските и американските претставници е закана по нејзиниот суверенитет.

 

Кина го смета Тајван за своја територија според системот „една земја, два системи“