Румен Радев е во посета на Австрија и присуствуваше на традиционалниот новогодишен концерт

 

Претседателот на Бугарија, Румен Радев, пристигна во посета на Виена, на покана на австрискиот федерален канцелар Карл Нехамер. Главна тема меѓу нив е заштитата на надворешните граници на Европската унија и општата посветеност на сите земји кои ги штитат.

Радев е во Виена на покана на Карл Нехамер на годинашното издание на традиционалниот новогодишен концерт на Виенската филхармонија во Златната сала на „Музикфераин“, каде што се одржува традиционалниот новогодишен концерт.

Радев и Нехамер разговараа за клучното значење за справувањето со илегалната миграција. Во разговорот, двајцата ја истакнаа добрата соработка меѓу Бугарија и Австрија и разговараа за европската миграциска и азилантска политика, пред Европскиот совет на 9 и 10 февруари.

Според претседателот на Бугарија, Румен Радев, заштитата на надворешните европски граници бара уште поблиска соработка меѓу европските земји, како и насочена техничка и финансиска поддршка од ЕУ.

Федералниот канцелар Карл Нехамер изрази благодарност за поканата што ја прифати бугарскиот претседател Румен Радев да ја посети Виена за продолжување на билатералниот дијалог и ја истакна желбата на Австрија да ја зајакне соработката за заштита на надворешните граници на ЕУ за справување со илегалната миграција.

Според Карл Нехамер, Европа не може да си дозволи десетици илјади нерегистрирани мигранти да минуваат низ територијата на земјите-членки на ЕУ. Високиот број на илегални мигранти, исто така, претставува сериозен проблем за безбедноста на целата Европска унија, за што е потребна поголема поддршка за земјите кои ги чуваат надворешните граници на Унијата и се изложени на миграциски притисок, вклучително и Бугарија.

Австрискиот канцелар Карл Нехамер на 23 јануари ќе ја посети Бугарија каде ќе се запознае со мерките што ги преземаат властите за заштита на границите на ЕУ. Нехамер истакна дека Бугарија вложила многу напори за зајакнување на заштитата на надворешните европски граници за да се спротивстави на зголемениот миграциски притисок, а Бугарија треба да добие и поголема финансиска поддршка од ЕУ за подобрување на граничната ограда, како и за зголемување на присуството на Фронтекс.

Румен Радев разговараше и со сојузниот претседател на Австрија, Александар Ван дер Белен и со министерот за надворешни работи на Индија, Субраманјам Џаишанкар, кој исто така е во Виена за традиционалниот новогодишен концерт.