Италијанската полиција објави дека запленила рекордна количина амфетамини во форма на 84 милиони таблети произведени во Сирија.
„Ова е најголема количина на амфетамин што полицијата досега ја запленила на глобално ниво“, рече полковникот Доменико Наполитано, директор на финансиската полиција во Неапол.
Пазарната вредност на дрогата запленета во Салерно, јужно од Неапол, е една милијарда евра, се вели во соопштението на италијанската полиција.
Таблетите имаат два полукруга на нив, знак на каптагон кој се смета за наркотик и се користи за „финансирање на тероризам“, се вели во соопштението.
„Познато е дека групата Исламска држава насекаде ги финансира своите терористички активности со шверц на синтетички лекови произведени во Сирија, која стана водечки светски производител на амфетамини во последниве години“, рече истиот извор.
Весникот „Ла Република“ пишува дека пратката требало да биде доставена до швајцарска компанија со седиште во Лугано, во сопственост на италијански државјанин.
#GDF #Napoli, sequestro record di 14 tonnellate di #anfetamine: 84 milioni di pasticche prodotte in #Siria da ISIS/DAESH per finanziare il #terrorismo. Oltre 1 miliardo di euro il valore sul mercato. #NoiconVoi pic.twitter.com/McdOljNxa5
— Guardia di Finanza (@GDF) July 1, 2020
Епидемиолошките мерки воведени како резултат на коронавирусот го стопираа производството и дистрибуцијата на синтетички лекови во Европа, така што многу шверцери започнаа да се снабдуваат во Сирија.
Италијанската полиција посочи дека оваа дрога, што се продава ширум Блискиот исток, е „многу распространета меѓу џихадистите бидејќи го отстранува стравот и болката“.