За 9 часа 24 послаби земјотреси во близина на Битола, голем број граѓани ноќта ја минаа надвор

Од првиот земјотрес со јачина од 5,8 степени кој се случи синоќа во 22,43 часот на пет километри северозападно од Лерин во Грција, до утрово беа регистрирани, а дел и почувствувани во Битола, 24 земјотреси. Двата посилни потреси утрово битолчани ги почувствуваа во 7,28 и 8,01 часот. Едниот со епицентар на седум километри од Лерин и јачина од 3,6 степени, а другиот нешто послаб на девет километри од Аминдео, исто така во Грција.

Од сите 24 земјотреси до утрово само еден е со епицентар на македонска територија, поточно на 21 километар од Новаци, а сите други се во Северна Грција во Леринскиот Регион.

Земјотресите во Битола предизвикаа мали материјални штети, како пукање на тавани и ѕидови, но и страв кај жителите кои дел од ноќта ја поминаа будни на улиците.

Утрово во Битола врнe дожд, па повеќето битолчани и покрај утринските потреси сепак останаа во домовите.