Четвртиот бран стивнува – ковид мерките остануваат

Надлежните сметаат дека се додека нема доволно имунизирано население, не може да се зборува за укинување на мерките.

Серолошката анализа покажа дека 86 отсто од вакцинираните и 75 отсто од невакцинираните кои прележале ковид-19, имаат имунитет, истакна министерот за здравство Беким Сали и додаде оти е оптимист за општата состојба со ковид во земјава, но не и за антиковид-мерките.

Како што кажа и самиот, сè уште се наоѓаме на граница помеѓу жолта и зелена зона во врска со ковид-состојбата, но повеќе одиме кон жолтата.

„Оптимист сум за општата состојба кај нас, меѓутоа сè уште не сум оптимист за мерките“,истакна министерот.

Тој посочи дека индикаторот за хоспитализација и новоинфицирани е позитивен, но оти веќе не е показател само бројот на новоинфицирани, туку дека е многу значајно колку се новоинфицирани и хоспитализирани на 100 000 жители и колку од нив имаат последици од тоа.

Досега во земјата се направени вкупно 1.925.963 тестирања на КОВИД-19. Вкупната бројка на КОВИД-дијагностицирани лица во нашата земја од почетокот на епидемијата изнесува 301.895, бројот на оздравени пациенти е 290.907, на починати е 9.155, а бројот на активни случаи изнесува 1.833.