Основниот кривичен суд во Скопје го осуди Тони Јакимовски, шеф на кабинетот на поранешниот директор на УБК Сашо Мијалков на 6 години затвор во предметот „Специјална каса”, соопштија од Судот. Оваа пресуда не е правосилна и странките имаат право на жалба на пресудата.
Неговиот колега од УБК Стево Маџовски доби казна затвор од 4 години, а третообвинетата Кристина Јосифовска доби ослободителна пресуда.
Тие беа обвинети за кривичното дело Злоупотреба на службената положба и овластувања.
„Основниот кривичен суд Скопје денеска ја објави пресудата за предметот со КОК бр. 101/19 во јавноста познат како „Специјална каса” според која обвинетите Т.Ј. и С.М. ги огласи за виновни за кривичното дело Злоупотреба на службена положба и овластување по чл. 353 ст.5 в.в со ст.1 од КЗ и ги осудува на казна затвор и тоа: Т.Ј. на казна затвор во траење од 6 години во која казна му се засметува времето поминато во притвор, С.М. го осудува на казна затвор во траење од 4 години”, велат од Судот.
Судот утврдил дека обвинетите подигале парични средства за потребите на касата за исплата на средства за посебни намени за УБК, но воедно утврдено е дека евиденцијата за потрошените парични средства се уништени заедно со документацијата за исплата, односно главната книга за евиденција без за тоа да постои посебно одобрение од директорот на Управата и без за тоа да биде формирана комисија за ништење на материјална документација.