Царовска: Наставата ќе биде со физичко присуство се додека дозволува епидемиолошката состојба
Создадени се услови почетокот на новата учебната година, на први септември, да биде со физичко присуство на учениците. Предлогот на Министерството за образование и наука бил прифатен на вчерашниот состанок на Главниот координативен кризен штаб, што го водеше премиерот Зоран Заев, а денеска Владата ќе донесе одлука согласно протоколите, потврди министерката за образование Мила Царовска.
-Искуството од мината година покажа дека училиштата имаат капацитет за спроведување на настава со физичко присуство и се додека го дозволува епидемиолошката состојба и секако Комисијата за заразни болести подобро е да се спроведува на овој начин иако имаме подготвени три модели за следење на наставата, рече таа.
Како што појасни Царовска, донесени и посебни протоколи, кои опфаќаат носење маски, почесто миење на рацете, проветрување на просториите и распоред на влегување во зградата за да нема метеж.
Царовска појасни дека согласно протоколите епидемилошката служба во училиштата одлучува дали ќе има трансмисија на Ковид-19 доколку се појави дете со зараза во некое одделение и согласно проценките ќе биде одлучено дали некој ученик или целото одделение ќе оди во изолација.
-Нема подобро образование од тоа со физичкото присуството. Мината година учениците носеа маска за време на наставата од кои се ослободуваа за време на паузата и тоа се покажа како успешен модел. Ќе се направи распоред на влегување, директорите и наставниците имаат поддршка од МОН и заеднички ќе ја спроведеме наставата успешно, додаде таа.
Министерството за образование досега разгледуваше три можни сценарија за изведување на наставата: со физичко присуство, онлајн настава за учениците над четврто одделение и ротирање на учениците преку една недела со физичко присуство. Оттаму потврдија дека учебната година сигурно ќе започне на 1 септември и дека се вакцинирани околу 60 отсто од наставниот кадар. Од владата информираат и дека се очекува до септември зголемување до 80 отсто вакцинирани од вкупниот број вработени во училиштата.